Thursday, August 13, 2015

सोचेजति सजिलो छैन् इजरायलमा कमाउन

करिब ६ वर्षदेखि नेपाली कामदार लैजान रोकेको इजरायल सरकारले अब महिला कामदार ल्याउने भएको छ। श्रम तथा रोजगार मन्त्रालयको लामो पहलपछि इजरायली सरकार नेपाली महिला कामदार ल्याउन सहमत भएको हो। महिला कामदार इजरायल ल्याउने  सम्झौतामा हालै श्रम तथा रोजगार मन्त्रालयमा दुई देशका अधिकारीबीच कामदार ल्याउने विषयमा हस्ताक्षर भयो |


अहिले नेपालमा, इजरायल आउनको लागि ठूलै मान्छेको सोर्स लगाइरहेको पनि भेटिएको छ| हिजोको दिनमा कुन देश गएकी तिमी, इजरायल ? भन्दै नाक खुम्च्याउने दिदी बहिनीहरू आज हामी पनि इजरायल आउन पर्यो त्यताबाट मिलाइ दिनुपर्यो, लौ न भन्दै दिनकै ४,५ कल फोन यो पंक्तिकारलाई गर्छन्|

ती दिदी बहिनीहरुलाई लाग्न सक्छ, इजरायल आउनेबित्तिकै डलरको ओइरो लाग्छ| तर कुरा त्यसो होइन। सरकारले भने अनुसार १ लाख २५ हजार कमाउन कामदार दिदी बहिनीहरूले धेरै आँशु बगाउनु पर्छ | त्यो आँशुको मूल्य लाख त के करोडौं रूपैयाँले पनि चुकाउन सक्दैन।

हालै नेपाल सरकार र इजरायल सरकारले गरेको कामदारसम्बन्धी सम्झौतामा सुसारे कामदारको लागि विवाहित, आमा बनिसकेकालाई प्राथमिकता दिने भनिएको छ।  अविवाहित केटीहरु आए भने इजरायल मै बिहे गरेर बस्छन् नेपाल फर्कदैनन् भन्ने कुरामा इजरायल चनाखो भएको देखिन्छ। उता नेपाल सरकार भने कामदार पठाउन इजरायलसँग भिक मागिरहेको शैली देखाइरहेको छ।

इजरायलमा पैसा कमाइ त हुन्छ तर त्यो पैसाले किन्न नपाउने आफ्नो पन इजरायल लगायत अन्य देशमा विदेशिने महिलाहरूले कहिल्यै पाउँदैनन् भन्ने कुरा हेक्का राखेको देखिदैँन्। दुध खुवाउँदै गरेको बच्चा परिवारको काखमा फालिदिएर, अघिल्लो रातसम्म अँगालोमा बाँधिएर सुतेको श्रीमा्न एर्पोट पुर्याउन आउँदा हात छोड्न नसकेको त्यो मर्मस्पर्शी क्षण! फेरि त्यतिबेला जति भक्कनिए पनि लामो समयको बिछोडले उत्पन्न हुने शंका उपशंका र असमझादारीबाट कतिपयको त धन कमाउने लहलहैमा  पारिवारिक माया सधैँको लागि बिदा भएको कारूणिक स्थिति हाम्रा आँखाले धेरै देखिसकेका छन्।  


इजरायलमा रहेका नेपाली  कामदारमध्ये झण्डै ८५% महिला छन्। घर भित्र रहेर केयर गिभरका रूपमा बुढाबुढीको स्याहारमा व्यस्त हुनुपर्ने उनीहरूको काम हो। जसरी बाहिरबाट हाँसीखुसी  इन्टरनेट चलाएर, लेख रचना गरेर वा राम्राराम्रा फोटाहरु अपलोड गरेको देखेर धेरै पैसा कमाएको देखिन्छ तर यहाँको यथार्थ बेग्लै छ| कहिँकतै सजिला काम भए पनि धेरैजसो अल्जैमर रोगी हेर्नुपर्छ| अरु सबैखाले बिरामीभन्दा यो रोगका बिरामी देख्दा सजिलो भए पनि मानसिक रुपमा धेरै तनाब बेहोर्नुपर्छ|  बिरामीहरू बेलाबेलामा झर्किने/रिसाउने हुन्छन्| त्यसबेला आफू संयमित भएर हाँसीहाँसी उनीहरुलाई सामान्य अवस्थामा ल्याउनु पर्छ| बिरामीको अवस्था हेरेर आफू २४ घण्टा ड्युटी गर्न तयार भएर बस्नुपर्छ |कुनै बिरामी सजिला हुन्छन, कामदारलाई पनि बुझ्ने हुन्छन् भने  कुनैले काम गर्ने मेसिन सरह सोच्छन् र केवल काममा मात्र दलाइरहन्छन्।

इजरायलको काममा झट्ट हेर्दा खानपिन बसाईं लगायत स्वास्थ्य उपचार फ्री भएको जस्तो देखिन्छ तर यो बिल्कुल  सत्य होइन।   मालिकहरुले एक कौडी पैसा खर्च गरेका हुँदैनन् न त हामीलाई दया नै गर्छन्|  कामदारले पाउनु पर्ने तलबबाट कटाएर नै यस्तो सुविधा दिएइको हो । त्यसमाथि पनि  भाषा जानेकालाई छुट्टै व्यवहार हुन्छ भने नजानेकाले आफूले पाउनु पर्ने सुबिधाबाट बन्चित हुनुपर्छ|

कामदारको रूपमा यी यावत् हेपाई सहनु पर्दा आफ्नै देश, परिवार झल्झली सम्झेर तरक्क आँशु झर्छ| इजरायलको कामलाई जति राम्रो भनिए पनि आखिर यो परदेश हो| यहाँ जरो आउँदा टाउको समाई दिने आफन्त छैनन् |धेरै बिरामी परे हस्पिटलको शैयामा एक्लै लडिरहनु पर्छ| त्यतिबेला आकाश झरेर च्यापे जस्तो महसुस हुन्छ| यो पीडा सम्पूर्ण परदेशिएका नेपालीहरुको हो|

अन्तमा, सरकार आफ्ना देशका नागरिकलाई काम गर्न विदेश पठाएको कुरामा खुसी हुने वातावरण रोकिनु पर्छ। उनीहरूलाई त देश निर्माण गर्न लगाउने र देशप्रतिको दायित्व निर्वाह गर्न उत्प्रेरित गर्न पहल गराएमा सर्वोत्तम हुने थियो । यदि त्यो संभव छैन र देशको अवस्थालाई ध्यानमा राखेर युवा शक्ति विदेश श्रम गर्न पठाउनै पर्ने भयो भने पनि पठाउनुभन्दा पहिला  यथोचित तालिम दिनुपर्छ । भिडियो हेर्न तलको बाकस थिच्नुहोस

Write Comment Below:

No comments:

Post a Comment