Wednesday, August 26, 2015

मोदीको गुजरातमा हिंसा भड्केपछि सेना बोलाइयो

झडपमा तीनजनाको ज्यान गयो
एजेन्सी : भारतीय प्रधानमन्त्री नरेन्द्र मोदीको सहर गुजरातको अहमदाबादमा मंगलबारबाट शुरु विरोधले उग्ररुप लिएपछि तीनजनाले ज्यान गुमाएका छन् ।

गुजरात प्रहरीका डिजीपी पिसी ठाकुरले बताएअनुसार अहमदाबादमा पटेल समुदायले थालेको आन्दोलन उग्र भएपछि गोली चलाउँदा तीनजना मारिएका हुन् ।

उनका अनुसार उग्र भएका प्रदर्शनकारीले बनासकान्ठा जिल्लामा रहेको गढ पुलिस कार्यालयमा पनि प्रदर्शनकारीले आक्रमण गरेका छन् । प्रहरी चौकीमा आक्रमणका क्रममा एक प्रदर्शनकारी मारिएका छन् ।

गुजरातको अहमदाबादको नौवटा प्रहरी कार्यालयको क्षेत्र, सुरतको दुर्इवटा प्रहरी कार्यालयको क्षेत्रसहित राज्यका १७ वटा सहरी इलाकामा कर्फ्यू लगाइएको छ ।


राज्यमा हिंसा भड्केर स्थिति नियन्त्रण बाहिर जाने अवस्था आएपछि सेनालार्इ बोलाइएको छ । डिजीपी ठाकुरका अनुसार गुजरातका सबै दलका वरिष्ठ नेता र धर्म गुरुहरुलार्इ मानिसलार्इ कानुन व्यवस्था कायमका लागि अपिल गर्न भनिएको छ ।

हिंसाले उग्ररुप लिन थालेपछि गुजरातमा सबै शैक्षिक संस्थाहरु बन्द गरिएको छ । पटेल समुदायले बुधबारै गुजरात बन्दको अपील गरेको थियो ।

मुख्यमन्त्री आनन्दीबेन पटेलले गुजरातबासीलार्इ शान्ति कायम गरिराख्न अपील गर्दै राज्यमा कानुनी व्यवस्था कायम राखिराख्न पनि सबैसँग सहयोग मागेका छन् ।

आरक्षणको माग लिएर आन्दोलन गरिरहेका गुजरातका पटेल समुदायले मंगलबार राति उग्र बनेर कयौं स्थानमा आगजनी गरेका छन् ।

आन्दोलनको नेतृत्व गरिरेहका २२ वर्षीय हार्दिक पटेललार्इ मंगलबार राति पुलिसले हिरासतमा लिएपछि उनका समर्थक उग्र भएका थिए ।


उनका समर्थकले करिब ४० वटा बस र अन्य गाडी जलाएका छन् । हिंसा बढ्दै गएपछि सरकारले मोबाइल इन्टरनेट सेवा बन्द गरिदिएको छ ।

मंगलबार काटिएको मोबाइल र इन्टरनेट सेवा बुधबार अपरान्हसम्म पनि सुचारु गरिएको छैन ।

पटेल समुदायले आरक्षण माग गर्दै आन्दोलनमा उत्रेको छ । यसको नेतृत्व २२ वर्षीय हार्दिक पटेलले गरिरहेका छन् ।

उनको नेतृत्वमा मंगलवार अहमदाबादको जिएमडीसी मैदानमा र्‍याली गरिएको थियो । यो र्‍यालीमा लाखौंको संख्यामा मानिसहरु सहभागी भएका थिए ।
/www.annapurnapost.com

Write Comment Below:

No comments:

Post a Comment