Wednesday, August 19, 2015

संविधानसभा छोड्ने सद्‍भावनाको घोषणा 'राजनीतिक'

काठमाडौं : राजेन्द्र महतो नेतृत्वको नेपाल सद्‍भावना पार्टीले पत्रकार सम्मेलन गरेर संविधानसभा छोड्ने  घोषणा गरे पनि त्यसको औपचारिक जानकारी संविधानसभा सचिवालय वा व्यवस्थापिका संसद् सचिवालयमा अहिलेसम्म पुगेको छैन।

सचिवालयसम्वद्ध स्रोतका अनुसार यसबारेमा औपचारिक सूचना वा पत्र नआएकोले यसलाई राजनीतिक घोषणा वा चेतावनीका रुपमा मात्र लिइएको छ। सद्‍भावनाका पाँचैजना सभासद्ले राजीनामा दिने घोषणा मंगलबार बेलुका गरे पनि राजीनामापत्र बुधबार मध्यान्हसम्म पनि संसद् वा संविधानसभा सचिवालयमा बुझाएका छैनन् ।


राजीनामा आइहाले पनि यसमा कानुनी समाधानको अर्थ नहुने संविधानसभा सचिवालय स्रोतले बतायो। 'यो राजनीतिक विषय भएकोले राजनीतिक ढंगबाटै समाधान खोजिएला। राजीनामालाई स्वीकृत वा अस्वीकृत गर्नुको कुनै अर्थ हुँदैन, स्रोतले भन्यो, 'यो राजनीतिक दबाब मात्र पनि हुनसक्छ ।'


संविधानसभा छोडे भने पनि सद्‍भावना पार्टीले व्यवस्थापिका संसद् छोडेको घोषणा गरेको छैन। अहिले संविधानसभा नै व्यवस्थापिका संसद्को हैसियतमा काम गरिरहेको छ। त्यसैले सद्भावनाको यो घोषणालाई सभाध्यक्ष सुवास नेम्वाङले पनि राजनीतिक घोषणाका रुपमा मात्रै लिएको दाबी स्रोतले गरेको छ।

संविधानसभा छोड्ने घोषणाबारे सद्‍भावनाका अध्यक्ष महतो र संसदीय दलका नेता लक्ष्मर्णलाल कर्णसँग सभाध्यक्ष र चार दलको तर्फबाट अनौपचारिक रुपमा  बुझ्ने पहल भइरहेको छ।
annapurnapost.com

Write Comment Below:

No comments:

Post a Comment