Tuesday, August 18, 2015

तीन मुख्य दलका नेताले भने, पश्‍चिमाञ्चल टुक्राउन पाइँदैन

काठमाडौँ : पश्चिमाञ्चल विकास क्षेत्रबाट प्रतिनिधित्व गर्ने अधिकांश नेता तथा सभासद्ले देश सङ्घीयतामा जाँदा आफ्नो क्षेत्रलाई एउटै प्रदेशमा राख्नुपर्नेमा जोड दिएका छन्।

नेपाली काँग्रेसको संसदीय दलमा मंगलबार भएको भेलामा उनीहरुले सो क्षेत्रमा विकासका लागि चाहिने सामथ्र्य र पहिचान दुवै मिलेकाले क्षेत्र टुक्र्याउन नहुने अडान राखे । उनीहरुले त्यस क्षेत्रमा सिद्धार्थ गौतम जन्मिएको लुम्बिनी, धार्मिकस्थल मुक्तिनाथ र पर्यटकीयस्थल पोखरालगायत ऐतिहासिक, धार्मिक तथा आर्थिक हिसाबले सम्भावना बोकेको प्रदेश भएकाले त्यसलाई कायम राख्नुपर्नेमा जोड दिएका छन्।

काँग्रेस उपसभापति रामचन्द्र पौडेलले पश्चिमाञ्चल क्षेत्र दुई विमानस्थल भएको तथा जलस्रोतमा पनि प्रचुर सम्भावना बोकेकाले यदि एउटै प्रदेश भएमा देशकै समृद्ध प्रदेश हुने सम्भावना रहेको बताए । “पश्चिमाञ्चलसँग सिमाना मिल्ने केही जिल्ला मिसाउन सकिन्छ, यदि आउनुहुन्छ भने स्वागत छ, तर पश्चिमाञ्चल चाहिँ एउटै हुनुपर्छ” – उनले भने।

काँग्रेस नेता गोपालमान श्रेष्ठले पनि उपसभापति पौडेलकै कुरामा समर्थन गर्दै भने – “पश्चिमाञ्चल एउटै प्रदेशमा बस्ने अठोट गरौँ, अरु जिल्ला पनि थपिन चाहन्छन् भने स्वागत छ ।”

नेकपा (एमाले)का उपमहासचिव विष्णुप्रसाद पौडेलले पश्चिमाञ्चल टुक्रिन नहुने भन्ने जनताको चाहना भएकाले आफूहरुले सोही माग राखेको बताए। “एकाध अरु जिल्ला थपेर पश्चिमाञ्चल कायम राख्ने सम्भावना छ” – उनले भने।

एकीकृत नेकपा (माओवादी)का सचिव टोपबहादुर रायमाझीले पश्चिमाञ्चल अखण्ड राख्दा एकाध जिल्लाबाहेक असन्तुष्टि नरहेको बताउँदै भने – “साझा मनोविज्ञान, सामथ्र्य र सम्भावना मिलेको छ, नाम जे राखे पनि केही फरक पर्दैन । ”

भेलामा शङ्कर भण्डारी, धनराज गुरुङलगायतले पनि पाँच विकास क्षेत्रलाई नै सङ्घीय प्रदेश मानेर पाँच प्रदेशमा जानुपर्नेमा जोड दिएका छन्। रासस
annapurnapost.com

Write Comment Below:

No comments:

Post a Comment