Monday, August 24, 2015

छिटो र राम्रो संविधानका लागि बाबुरामका छ सूत्र

काठमाडौं : संविधानसभाको सम्वाद समितिका सभापति रहेका एमाओवादीका वरिष्ठ नेता डा.बाबुराम भट्टराईले छिटो संविधान राम्रो संविधान बनाउन सबै अग्रगामी शक्ति एक हुनुपर्नेमा जोड दिएका छन् । भट्टराईले सामाजिक सञ्जालमार्फत यस्तो आग्रह गरेका हुन्।

संसमा प्रस्तुत परिमार्जित विधेयकलाई दलहरुको सहमतिमा संशोधन हालेर थप परिमार्जन/परिवर्तन गर्ने अझै ठाउँ र समय बाँकी रहेको बताउँदै उनले भने, हिजोका हामी सबै आन्दोलनकारी सहकर्मीहरुले आपसमा फुटेर हैन जुटेर संवाद/सहमतिद्वारा देशलाई छिटो निकास दिऊँ।


अंधेरो कुनामा बसेर संविधान बन्न नदिने र देशलाई अस्थीरताको भुमरीमा फसाइराख्ने षड्यन्त्र गर्नेहरुलाई परास्त गर्न सबै एकजुट हुनुपर्ने बेला आएको उनले बताएका छन्।


उनले अहिले बाहिर देखिएका असन्तुष्टी र विरोधको समाधानका लागि केही सूत्र पनि पेस गरेका छन्। बाबुरामले पेस गरेका समाधानका सूत्र यस्ता छन्:

- सीमांकन: ७ प्रदेशको मोडेल भित्रै प्रदेश-१ को मधेसी/थारु बाहुल्य क्षेत्र प्रदेश-२ मा राख्‍ने। प्रदेश-५ को मगर वाहुल्य क्षेत्र प्रदेश-४ मा राख्ने; प्रदेश-७ को थारु वाहुल्य क्षेत्र प्रदेश-५ मा राख्‍ने।

- नागरिकता: पुरुषको विदेशी दम्पत्तिलाई झैं महिलाको विदेशी दम्पत्तिलाई पनि ( आवश्यक परे थप शर्त सहित ) अंगीकृत नागरिकता र एकल महिलाका सन्तानलाई सहज नागरिकता दिने व्यवस्था गर्ने।

- महिला र दलितलाई निश्चित प्रतिसत प्रत्यक्ष निर्वाचन क्षेत्र छुट्याउने।

- देशमा परिवर्तनको वास्तविक अनुभुति गराउन र राजनीतिक स्थीरता कायम गर्न प्रत्यक्ष निर्वाचित कार्यकारी प्रमुखको व्यवस्था गर्ने।

- नेपाली समाजको वहुधार्मिक चरित्र र लामो धार्मिक सहिष्णुताको परम्परा कायम गर्दै राज्यलाई धर्मनिरपेक्ष राख्ने।

- न्याय प्रणाली, संवैधानिक आयोग लगायत अन्य विषयमा सहमतिले आवश्यक परिमार्जन गर्ने।
annapurnapost.com

Write Comment Below:

No comments:

Post a Comment