Friday, August 28, 2015

असन्तुष्ट नेताहरुलाई शितलनिवास बोलाएर राष्ट्रपतिले के भने

'तीन दलले अरुलाई बाइपास गर्न खोजे '
काठमाडौं : राष्ट्रपति डा. रामवरण यादवले संविधान निर्माण प्रक्रियामा असन्तुष्ट भएका मधेस केन्द्रित तथा अन्य दलको नेताहरुसँग सामूहिक रुपमा छलफल गरेका छन् ।


बिहान १० बजेदेखि ११ बजेसम्म शितल निवासमा राष्ट्रपति यादवले संघीय समाजवादी फोरम नेपालका नेता अशोक राईलगायतका अन्सन्तुष्ट मधेसी तथा अन्य दलका नेताहरुसँग छलफल गरेका थिए। भेटमा असन्तुष्ट दलका नेताहरुले सेना परिचालन गर्ने निर्णय, संविधान निर्माण प्रक्रियालगायतका विषयमा आफ्ना भनाइ राखेका थिए ।


भेटमा सहभागी राईका अनुसार राष्ट्रपति सेना परिचालनको निर्णय गलत भएकोले आफूले सच्चाउन प्रधानमन्त्रीलाई भनिसकेको र त्रुटी भएकोमा प्रधानमन्त्रीले नै माफी मागेको बताएका थिए । राजनीतिक समस्याको समाधान राजनीतिक ढंगबाट खोजिनुपर्ने र यसमा सेनालाई मुछ्न नहुने भनाइ राष्ट्रपतिले राखेका थिए ।

संविधान निर्माण प्रक्रियामा असन्तुष्ट दलहरुलाई समेट्नका लागि आफूले सक्दो पहल गरिरहेको राष्ट्रपति यादवले बताएका थिए। राष्ट्रपतिले प्रधानमन्त्री तथा मुख्य दलका शीर्ष नेताहरुलाई थोरै ढिला भए पनि सबैलाई समेटेर संविधान ल्याउन सुझाव दिएको बताए। उनले तीन दलले मात्रै संविधान ल्याएर ठीक नहुने बताउँदै सबैलाई समेट्नुपर्ने धारणा राखेका थिए।

राष्ट्रपतिको भनाइ उधृत गर्दै राईले अन्नपूर्ण पोस्ट्सँग भने, 'तीन दलले अरुलाई बाइपास गर्न खोजेका छन् । यो ठीक हुँदैन । यसबारेमा मैले प्रधानमन्त्री र मुख्य दलका नेताहरुलाई भनिसेको छु ।'


राष्ट्रपतिसँगको भेटमा नेपाल सद्भावना पार्टीका उपेन्द्र महतो, तराई मधेस सद्भावना पार्टीका रामनरेश यादव, संघीय थारुवान पार्टीका भानु चौधरी, तमलोपाका गोविन्द चौधरी, संघीय लोकतान्त्रिक पार्टीका कुमार राई लगायत थिए ।
annapurnapost.com

Write Comment Below:

No comments:

Post a Comment