Saturday, August 22, 2015

फुच्ची अर्बपति

भाद्र ५, २०७२- शिक्षाका लागि केही वर्ष विदेशमा बसेर स्वदेश फर्केकी एक वर्षभित्रै धनाढ्यको सूचीमा परिन्, उनी । तीन दीदीबहिनीमध्ये अब्बल दर्जाकी उनी बुबाको विश्वासपात्र भएकीले सम्पत्तिको हकदार बनिन् ।

चेली/छोरीमाथि विश्वास गर्नु हुन्न भन्ने मान्यता अझै पनि धेरैजसो समाजमा विद्यमान छ । खासगरी हाम्रो जस्तो पितृसत्तात्मक सोच भएको मुलुकमा छोरी भएकै कारण विभेद हुने गरेको छ । अझ छोरीलाई अंश दिनुपर्छ भन्ने कुरा चल्नासाथ धेरै परिवारमा किचलो सुरु हुने गरेको छ ।

तर चीनको ग्वाङडोङका एक जना बुबाले छोरीलाई आफ्नो सम्पूर्ण सम्पत्तिको हकदार बनाएर उदाहरणीय बनेका छन् । यसरी बुबाको सम्पत्ति पाउने भाग्यशाली चेली हुन् याङ हुइयान । यसो त उनीमाथि बुबाले त्यत्तिकै विश्वास भने गरेका होइनन् ।

बुबाले खोलेको कम्पनीमा छोरीले सबै ऊर्जा खर्चिन् र विश्वासपात्र बनिन् । हो, तीनै याङ हुइयान हाल विश्वकै धनाढ्यहरूको सूचीमा परेकी छन् । ३३ वर्षकी उनी चीनको फोसानमा बस्छिन् ।

विवाहित भएर पनि बुबाको उत्तराधिकारीको जिम्मेवारीलाई उनी अत्यन्तै राम्ररी निर्वाह गरिरहेकी छन् ।

फलस्वरूप उनको पिताले खडा गरेको रियल स्टेट कम्पनी ‘दिन दुई गुना रात चौगुना’ उचाइको शिखर चुम्दै आएको छ । अमेरिकास्थित ओहियो स्टेट विश्वविद्यालयबाट कला/विज्ञानमा स्नातक उनको सम्पत्तिको स्रोत अहिले रियल स्टेट बनेको छ ।

फोर्ब्स अखबारका अनुसार सन् २०१५ अगस्ट २१ (रियल टाइम) सम्म याङको कुल सम्पत्ति ४ दशमलव ८ अर्ब अमेरिकी डलर छ ।

चिनियाँ धनाढ्यहरूको सूचीमा अघिल्लो वर्ष उनी १९ औं र यो वर्ष २१ औं स्थानमा रहेकी छन् । सन् २०१४ मा भने उनी विश्वको अर्बपति सूचीमा १९६ औं स्थानमा थिइन् ।

चिनियाँ धनाढ्य महिला र अर्बपति युवाहरूमध्येका उनी अर्बपति बन्नुमा उनको बुबालाई धन्यवाद दिनैपर्छ ।

रियल स्टेट डेभलपर ‘कन्ट्री गार्डेन होल्डिङस’ का संस्थापक बुबा येउङ क्वक केउङबाट उनले सम्पत्ति मात्रै पाइनन्, संघर्ष गर्न समेत सिकिन् । कम्पनीलाई थप उचाइमा पुर्‍याउन उनले आजसम्म पनि भरमग्दुर प्रयास गरिरहेकी छन् ।

याङ अहिले कन्ट्री गार्डेन कम्पनीकी उपाध्यक्ष र बोर्डस गर्भरवेन्स कमिटीका एक सदस्य पनि हुन् । उनी संलग्न कम्पनीले सन् २०१४ मा आफ्नो सेयर बेचेर ४१० मिलियन अमेरिकी डलर उठाउन सफल भयो ।

त्यही वर्ष उनको कम्पनीले सिड्नीमा ६५ मिलियनमा एउटा डेभलपमेन्ट साइट खरिद गर्दै अस्ट्रेलिया प्रवेश गरेको थियो । यसको अर्थ उनी आफ्नो कम्पनीलाई चीनमा मात्रै सीमित राख्न चाहिनन् ।

सन् १९८१ मा चीनको ग्वाङडोङ प्रान्तको सुन्डेमा जन्मेकी उनको सम्पत्तिको स्रोत कन्ट्री गार्डेन होल्डिङसमा प्रमुख लगानी नै हो । हाल उनी चीनकै पाँचौं धनाढ्य महिलाका रूपमा दरिएकी छन् । यति मात्रै होइन एसियाकै सबैभन्दा फुच्ची धनाढ्य महिलाको परिचय पनि पाएकी छन्, याङले ।

धेरैले उनलाई बुबाको सम्पत्तिबाट धनाढ्य बनेकामा खिसी पनि गर्छन् । तर याङको बुबाले अर्बौंको सम्पत्ति कसरी जोडे भन्नेबारे धेरैलाई थाहा नहुन सक्छ अनि छोरीलाई कसरी यत्रो सम्पत्ति हस्तान्तरण गरियो भन्ने चासो पनि धेरैको नहुन सक्छ ।

तर बुबा र छोरीको केमिस्ट्रीले कम्पनी धनी बनेको एउटा यथार्थ हो ।

ग्वाङडोङको बिगुइयुआनमा सन् १९९७ मा खोलेको कम्पनीको ७० प्रतिशत सेयर त्यही केमिस्ट्रीले छोरीको नाममा स्थानान्तरण गरिएको हो ।

त्यसैले त ४० वर्षभन्दा कम उमेर समूहमा अर्बपति बन्ने सूचीमा याङ पनि परेकी हुन् । सिंगापुरमा प्रधान कार्यालय रहेको कन्सटेन्सी ‘बेल्थ–एक्स’ ले गरेको एक सर्वेअनुसार याङसँग हाल ५ दशमलव १ अर्ब अमेरिकी डलर बराबरको सम्पत्ति रहेको छ ।

उनको बुबाले सम्पत्ति हस्तान्तरण गर्दा ताका उनी २५ वर्ष की थिइन् । यही उमेरमा उनी चीनको सबैभन्दा धनी बनिसकेकी थिइन् । तीन दीदीबहिनीमध्ये उनी दोस्रो हुन् ।

पढाइको सिलसिलामा विदेसिए पनि पछि उनी स्वदेश फर्केर सन् २००५ मा बुबाको कम्पनीमा ‘पर्चेजिङ म्यानेजर’ जिम्मा पाइन्, यसैमा उनी रमाउन थालेकी थिइन ।

तर ओहियो स्टेट विश्वविद्यालयमा मार्केटिङ र लजिस्टिक विषय पढेकी तथा कठोर परिश्रम गर्न कहिले नथाक्ने स्वभावकी याङको कार्यशैलीले कम्पनीमा म्यानेजर बनेको एक वर्षपछि सन् २००६ मा कार्यकारी निर्देशकको जिम्मेवारी पाइन् ।

कलिलै उमेरमा उनी कम्पनीको बोर्ड बैठकमा सहभागिता जनाउन थालेकाले उनले त्यस अवधिमा धेरै अनुभवहरू बटुल्न सफल भइन् । उनको विवाहबारे धेरै चर्चा/परिचर्चा हुने गरेको छ । ती मध्येको एउटा हो, याङले ‘गोप्य’ विवाह गर्नु ।

‘साउदर्न मेट्रोपोलिस न्युज’ का अनुसार याङले सन २००६ मा एक जना वरिष्ट चिनियाँ अधिकारीसँग विवाह गरिन् । उनले आफ्नो पब्लिसिटी कहिले चाहन्छिन्, चाहँदिनन् ।

त्यसैले तामझामका साथ उनले विवाह नगरेको बताइएको छ । तर कसैले उनको वैवाहिक कार्यक्रमको भिडियो इन्टरनेटमार्फत सार्वजनिक गरिदिए ।

त्यो एकाएक चर्चाको विषय बन्न पुग्यो । तर उनी त्यसबाट आत्तिइनन् । एक किसानबाट रियल स्टेट व्यापारको मालिक बने पनि उनको बुबाले आफ्नो धरातल बिर्सेका थिएनन् ।

खेतबाट पर्याप्त आम्दानी नभएकाले बुबाले इँटाभट्टामा पार्ट–टाइम काम कुरोलाई भलै उनले कसरी बिर्सन सक्छिन् ? त्यसैको परिणाम थियो, सादा विवाह समारोह ।

 यति मात्रै होइन बुबाको संघर्षका क्षणहरू उनले नजिकबाट नियाल्ने अवसरसमेत पाएकाले पनि तडकभडकमा उनको विश्वास फिटिक्कै थिएन, छैन ।

बुबाले कसरी केही रकम बचाउँदै ग्वाङडोङ प्रान्तमा पर्ती जग्गाहरू खरिद गरेका थिए, त्यो पनि उनलाई थाहा थियो ।

पछि त्यसैलाई घडेरीका रूपमा विकास गर्दै किनबेच गर्दै जग्गाको ठूलो कारोबारी बनेको कम्पनीको जिम्मेवारीमा रहेको याङको ध्यान अन्यत्र कतै गएन । यही व्यापारबाट उनको परिवार उँभो लागेको हो । कम्पनीलाई उचाइमा पुर्‍याउन सुरुका दिनमा याङले सुझाएको रणनीति महत्त्वपूर्ण बन्न पुग्यो ।

एउटी चेलीले कम उमेरमै कम्पनीलाई शीर्ष स्थानमा पुर्‍याउनु चानचुन विषय पक्कै होइन ।

सन् २००८ मा कम उमेरमै आफू संलग्न कम्पनीलाई छोटो समयमा लोकप्रिय बनाएको र मनग्ये नाफा आर्जन गर्न सफल बनाएकामा उनले ‘चाइना च्यारेटी अवार्ड स्पेसल कन्ट्रिबुसन अवार्ड’ प्राप्त पनि गरिन् ।

विश्वमा धेरै कम महिला होलान्, जसले सानै उमेरमा २० सदस्यीय कम्पनीको बोर्डको नेतृत्व गर्न सक्षम हुन्छन् । तर उनले त्यो पनि गर्न भ्याइन् । त्यसैले त सन् २०१२ मा चीनको सर्वाधिक शक्तिशाली २५ उद्यमीमहिलामा समेत उनी परिन् । फोर्ब्स अखबारका अनुसार याङ सन् २०१५ मा विश्वको अर्बपति सूचीमा ३०९ स्थानमा रहेकी छन् ।

Write Comment Below:

No comments:

Post a Comment