Saturday, September 5, 2015

अधुरै रह्यो इन्जिनियर बनाउने सपना

भाद्र २०, २०७२- गत सोमबार दिउँसो जिविस पर्साको गेट अगाडि ‘भुजा पकौडी’ नास्ता खाइरहेका थिए दिलीप चौरसिया। चिनी मिल कारखाना अगाडि सञ्चालनमा रहेको वीरगन्ज इन्स्टिच्युट अफ टेक्नोलोजीमा सिभिल इन्जिनियरिङमा डिप्लोमा अध्ययनरत २२ वर्षीय चौरसिया ट्युसन पढेर खाजा खाँदै थिए।

आन्दोलनकारीले सुरक्षाकर्मीमाथि ढुंगा बर्साउन थाले। पसलहरू धमाधम बन्द गरियो। केही समय अघिसम्म शान्त रहेको क्षेत्रमा कर्फ्यु लागेपछि तनावग्रस्त बन्यो।

स्थिति नियन्त्रण गर्न सुरक्षाकर्मीले चलाएको गोली लागेर चौरसिया सडक खण्डमा ढले। उपचारका क्रममा नारायणी उपक्षेत्रीय अस्पतालमा साँझ उनको मृत्यु भएको थियो। वीरगन्ज २५ मनियारी जगरनाथपुरका स्थायी बासिन्दा चौरसिया कलेज नजिक कोठा भाडा लिएर बस्दै आएका थिए।

डिप्लोमा तेस्रो वर्षमा अध्ययनरत उनको लक्ष्य सिभिल इन्जिनियर बन्ने थियो। दिलीपका दाइ पृथ्वीनाथ चौरसिया भन्छन्, ‘थप अध्ययनका लागि भारतको बैंग्लोरमा भर्ना गर्ने योजना थियो।’ शनिबार दिलीपको शवयात्रामा सहभागी उनले भाइको भर्नाका लागि रकमको जोहो र कलेजमा पत्राचार पनि गरिसकिएको सुनाए। परिवारमा सबैभन्दा कान्छो दिलीप अध्ययनशील रहेकाले उनकै चाहनाअनुसार सदरमुकाममा राखेर पढाइरहेका थियौं।

‘भाइको सपना अधुरै रह्यो,’ आँसु झार्दै उनले भने, ‘हामी ५ भाइमध्ये ऊ कान्छो हो।’ पछिल्लोपटक गत शनिबार रक्षाबन्धनका दिन भाइ घर आएको थियो, त्यो नै अन्तिम रहेछ,’ पृथ्वीनाथले सुनाए। सामाजिक सञ्जाल फेसबुकमा गितार बजाएको प्रोफाइल तस्बिर राखेका चौरसिया मिलनसार थिए।

‘उनी अध्ययनमा पनि राम्रो विद्यार्थीका रूपमा परिचित थिए,’ शवयात्रामा सहभागी चौरसियाका समकक्षीले भने। उनीसँगै वीरगन्जमा ज्यान गुमाएका अन्य ४ जनाको पनि शनिबार शवयात्रा निकालिएको थियो। सोमबार र मंगलबार सुरक्षाकर्मीको गोली लागी ५ को मृत्यु भएको थियो।

वीरगन्ज २५ मनियारीका २५ वर्षीय धर्मराज सिंह, बारा प्रसौनी नौतनका दीनानाथ साह, नौतनकै जयप्रकाश साह तेली र वीरगन्ज १९ निवासी सोहन साहको मृत्यु भएको थियो। वीरगन्जको राधेमाई क्षेत्रमा गोली लागी मरेका धर्मराज सिंह सशस्त्र प्रहरी बलका पूर्वजवान हुन्। २ महिना अघिमात्र उनले राजीनामा दिएका थिए। सीमा सुरक्षा बल पर्सामा दरबन्दी हुँदा सिंहले राजीनामा दिएका थिए।

नगवामा मंगलबार अपराह्न गोली लागी ज्यान गुमाएका २४ वर्षीय सोहनले वीरगन्जस्थित आर्मी ब्यारेक पछाडि चिया र नास्ता पसल चलाउँदै आएका थिए। वीरगन्ज १८ लक्ष्मनवा क्षेत्रमा ज्यान गुमाएका बारा नौतनका दीनानाथ र जयप्रकाश मिल्ने साथी थिए। २५ वर्षीय दीनानाथ नारायणी यातायात व्यवस्था कार्यालय अगाडि ड्राइभिङ सेन्टरमा लेखनदासको काम गर्थे।

जयप्रकाश जगदम्बा ग्यासमा कार्यरत थिए। मृतकलाई सहिद घोषणा, आश्रित परिवारलाई उचित क्षतिपूर्ति र घाइतेलाई उपचार गराउन स्थानीय प्रशासनले गृह मन्त्रालयलाई सिफारिस गर्ने जिल्ला शान्ति समितिले शुक्रबार निर्णय गरेपछि ६ दिनपछि शनिबार शव अस्पतालबाट उठेको हो। शवयात्रामा बारा, पर्साका हजारौंको सहभागिता थियो।

यसैबीच, गोली लागी वीरगन्जमा ज्यान गुमाएका ५ जनाको शनिबार सामूहिक अन्त्येष्टि गरिएको छ।

नारायणी उपक्षेत्रीय अस्पताल वीरगन्जबाट बिहान करिब ११ बजे निस्किेको शवयात्रा यहाँको घन्टाघर, नगवा, बाराको नौतन, पर्साको मनियारी, जगरनाथपुर हुँदै अलौं परिक्रमा गरी विन्दवासनीस्थित तिलावे नदीमा साँझ साढे ७ बजेको समयमा अन्त्येष्टि गरिएको हो। शवयात्रामा महिलासहित हजारौंको सहभागिता रहेको थियो।

शवलाई प्रत्येक मृतकको गाउँ/घर हुँदै परिक्रममा गराइएको थियो। शवयात्राका लागि स्थानीय प्रशासनले बिहान ९ बजेदेखि अपराह्न २ बजेसम्म कर्फ्यु हटाएको थियो। गत सोमबार ४ बजेदेखि वीरगन्जमा अनिश्चित कर्फ्यु लगाइएको छkantipur.ekantipur.com

Write Comment Below:

No comments:

Post a Comment