Wednesday, September 30, 2015

चिनियाँ नाका खोल्न खटियो एमालेको विद्यार्थी टोली, दुई दिनमा यसरी खुल्नेछ नाका

काठमाडौं, १४ असोज । सत्ता साझेदार दल नेकपा एमालेले चीनसँग जोडिएका नेपाली नाका खुलाउन विद्यार्थी टोली परिचालन गरेको छ ।
एमालेले भातृ संगठन अनेरास्ववियुका उपाध्यक्ष दीपक गौतमको नेतृत्वमा एक सय जना विद्यार्थीलाई स्वंयसेवक बनाएर चिनियाँ नाका खोल्न परिचालन गरेको एमाले प्रचार विभाग उपप्रमुख सूर्य थापाले जानकारी दिनुभयो ।
उहाँले भन्नुभयो- ‘भारतले गरेको अघोषित नाकाबन्दीले समस्या भएपछि छिटो भन्दा छिटो चीनसँग सम्पर्क गराउनलाई सजिलो होस् भनेर स्वयंसेवक परिचालन गरिएको हो । अबको दुई/तीन दिनभित्रै चिनियाँ नाका खुल्छ ।’
उहाँका अनुसार एमालेको विद्यार्थी टोली सिन्धुपाल्चोकको तातोपानी नाका खुलाउन विहीबार आज त्यसतर्फ प्रस्थान गरेको छ । नेकपा (एमाले)का स्थायी कमिटी सदस्य तथा पूर्व सञ्चारमन्त्री शङ्कर पोखरेलले प्रदर्शनीमार्गबाट अनेरास्ववियुका उपाध्यक्ष दीपक गौतमलाई श्रमदानमा प्रयोग हुने औजार (सामग्री) हस्तान्तरण गरी स्वयंसेवक टोलीलाई बिदाइ गर्नुभयो ।
विद्यार्थी स्वयंसेवकले २ दिनसम्म तातोपानी नाका खुलाउन श्रमदान गर्ने कार्यक्रम छ । नाका खुलाउन खटिएका नेपाल र चीनका कर्मचारीहरुलाई एमाले स्वंयसेवकहरुले आवश्यक सहयोग गर्नेछन् । एमालेले स्वयंसेवकहरुलाई जनही ५ सय रुपैयाँ, ज्याकेट र ड्राइफुडको व्यवस्था गरेको छ ।
dainiknepal.com

Write Comment Below:

No comments:

Post a Comment