Thursday, October 1, 2015

भारतको नाकाबन्दी खेपिरहेको नेपाललाई चीनको अर्काे सहयोग

काठमाडौँ, १४ असोज । चीनले आफ्नो सिचुआन प्रान्तको इमिसान सहरमा भएको ‘दोस्रो सिचुआन अन्तर्राष्ट्रिय ट्राभल एक्स्पो-२०१५’मा नेपालको पर्यटनको प्रवद्र्धनका लागि प्रचारप्रसार गरिदिएको छ  ।
नेपाल–चाइना चेम्बर अफ कमर्स एन्ड इन्डस्ट्रिजको सहकार्यमा नेपाल पर्यटन बोर्डले असोज ८ देखि १३ गतेसम्म सो प्रदर्शनीमा आफ्नो कक्ष राखेको बोर्डले जानकारी दिएको छ ।
नेपालको प्यागोडा शैली, विभिन्न क्षेत्रको पर्यटन आकर्षण, नेपाली हस्तकला लगायतका सामग्री प्रदर्शनीमा राखिएको थियो । बाह्र नेपाली हस्तकला संस्थाले त्यहाँ आफ्नो हस्तकलाको प्रचार गरेका थिए ।
प्रदर्शनीमा श्रव्य र दृश्य माध्यमबाट नेपालको पर्यटनबारे सूचना दिनुका साथै नेपालबारे जानकारीसहितको पुस्तिका नेपाली कक्षमा आएका चिनियाँ आगन्तुकलाई वितरण गरिएको थियो ।
कार्यक्रममा प्यासिफिक एसिया ट्राभल एसोसिएसन (पाटा)का अध्यक्ष केभिन बी. मुर्फेले नेपाली कक्षमा उपस्थित भई भूकम्पपछिको नेपाली पर्यटनको पुनः उत्थानका लागि आफ्नो संस्थाले सहयोग गर्ने जानकारी दिनुभयो ।
प्रदर्शनीमा करिब एक लाख पचास हजार आगन्तुकले अवलोकन गरेका थिए । चीनको दु्रत आर्थिक वृद्धिसँगै त्यहाँका जनतामा देखिएको घुम्ने संस्कृतिको विकासको फाइदा लिन आवश्यक छ । सिचुआन प्रान्तको छेन्दुदेखि काठमाडौँसम्मको सिधा हवाई उडान रहेकामा यसले नेपालको पर्यटन विस्तारको विशाल सम्भावन बढाउने अपेक्षा लिइएको छ । रासस
dainiknepal.com

Write Comment Below:

No comments:

Post a Comment